Gen 10 | WSK | STEP | Noah ko kuriang Shem, Ham, se Japheth nononga kuriang lom biya buring ko arataman mu nunga nunup imitang:

Genesis 10

Noah ko kuriang nunga taleng girigir

1 Noah ko kuriang Shem, Ham, se Japheth nononga kuriang lom biya buring ko arataman mu nunga nunup imitang:

Japheth ko taleng girigir

2 Se imi Japheth ko kuriang kari: Gomer, Magog, Madai, Javan, Tubal, Meshech, se Tiras. 3 Se imi Gomer ko kuriang kari: Ashkenaz, Riphath, se Togarmah. 4 Se imi Javan ko kuriang kari: Elishah, Tarshish, se ali sor Cyprus se Rhodes nunga kari. 5 Se kariimet umu kari langi anisan se kari tual gotektek te anisan mu nunga taleng girigir.

Se Japheth ko gue te kari arataman imi mu nomoke nomoke nunga sor te dagikasan, ale nunga den ago kirker.

Ham ko taleng girigir

6 Se imi Ham ko kuriang kari: Cush, Mizraim, Put, se Canaan. ^{▼▼Gen 10:6 Kari ilagala suwan imitang mu kariimet ali sor Ethiopia, Egypt, Libya mu te anisan wore nunga girigir alo.}

7 Cush ko kuriang kari mu Seba, Havilah, Sabtah, Raamah, se Sabteca. Se Raamah ko kuriang kari ilagala, Sheba se Dedan. 8 Se Cush mu ko kuriang bo ko nup Nimrod.

Nimrod mu ali imi te nu giram kari supuling sokel ago ko aratam. 9 Se Kari Biya nu saongam ale nu bulamara kari yawara ko aratam. Se mu ko kariimet balsan, “Kari Biya ninga sanguk se nina Nimrod iwita bulamara kari yawara ko aratalko,” ma balsan. 10 Ali sor Nimrod giram bitarukaso mu ko wonong bibiya ilagala suwan, Babylon, Erech se Akkad. Se wonong ilagala suwan mu Shinar (Babylonia) ko komasang te anikasan. 11 Udagi Nimrod Shinar beteram ale Assyria ali sor te namaram. Ale mu te ko wonong bibiya, Nineveh, Rehoboth-Ir, Calah, se Resen umutang kaolam. Resen mu Nineveh se Calah wonong biya mu nunga kusumuri bagakaso.

13 Mizraim mu Lydia, Anam, Lehab, Naphtuh, Pathrus, Casluh, se Caphtor alo umutang nunga taleng girigir. Se Philistia ko kariimet mu Caphtor ko taleng girigir la. ^{▼▼Gen 10:13-14 Pathrus mu Egypt ko koma south mu te bagakaso. Caphtor mu tual bo, se ko nup bo Crete.}

15 Canaan ko kuriang laun mu Sidon. Canaan mu kariimet imitang nunga girigir: Heth alo, 16 se Jebua alo, se Amor, Girgash, Hivi, Arki, Sini, Arvad, Zemar, se Hamath alo. Udagi te Canaan ko taleng girigir parasaman. 19 Nunga ali te dagiman bagakasan mu ko tom Sidon duap beteram nama wonong Gerar, Gaza duap te; se koma worem bausa te nama Sodom, Gomorrah, Admah, se Zeboiim. Zeboiim mu Lasha ko pingita.

20 Se umu Ham ko gue te ko taleng girigir arataman. Suwan suwan nongota nunga sor te dagi namaman, ale suwan suwan nunga den ago kirker.

Shem ko taleng girigir

21 Shem, Japheth ko laun, nu Hebrew suen la nunga girigir. 22 Se imi Shem ko kuriang kari nononga nunup: Elam, Asshur, Arphaxad, Lud, se Aram.

23 Se imi Aram ko kuriang kari: Uz, Hul, Gether, se Mesech.

24 Arphaxad mu Shelah ko nuet, se Shelah mu Eber ko nuet. 25 Se Eber ko kuriang kari ilagala, bo ko nup Peleg. Peleg ko tom te ali ko kariimet nunumi pagaru gilingiman, ale motam kirker bagakasan. ^{▼▼Gen 10:25 Nup Peleg mu ko nunguning nunumi paoga.} Se Peleg ko uria ko nup Joktan.

26 Se Joktan ko kuriang mu Almodad, Sheleph, Hazarmaveth, Jerah, 27 Hadoram, Uzal, Diklah, 28 Obal, Abimael, Sheba, 29 Ophir, Havilah, se Jobab. Se imi suen la Joktan ko kuriang kari wore nunga nunup. 30 Se sor kari ari mu te bagakasan mu Mesha duap beteram nama wonong Sephar, sor duruk ago koma worem bausa mu te aratam.

31 Kari ari mu Shem ko gue te arataman. Se suwan suwan nongota nunga sor te nama dagiman, ale nunga den ago kirker.

32 Se nunup imi kariimet Noah ko kuriang nungumik te arataman wore nunga nunup, ale nunga wonong nunga nunup. Yu lom biya menaram se ko buring ko kariimet sor suen biya te anisan mu Noah ko kuriang nungumik te la aratu sapaman.